حفلات الزفاف في نابلس

حفلات الزفاف في نابلس


طبعا اذا بدنا نحكي عن قبل العرس بنخلصش لانو القصص طويلة من عزيمة وتعارف الاهلين عبعض وتجهيز وكوافير وبدله ودهب ومكياج وقصص طويلة ... خلينا بالعرس هلأ


العرس ببلش من وقت ما بتروح العروس عند الكوافيره والعريس بروح عصالون يزبط حالو وبكون مدبر حالو بسيارة مرتبه هو او اصحاب العرس وطبيعي بتكون مزينه ومرتبه عشان العرس


اكيد النسوان بكونوا من الصبح بالقاعة عشان يحجزوا اول صف قريب عاللوج عشان يعرفو يشوفوا شو بلبس العريس وشو بلبسها اخوها وابوها ومش عارفة مين كمان


بدخل العريس والعروس من باب القاعة بزفة من اصحابه او فرقة زفة مخصصة (بنابلس بقولولها فرقة الطرابيش) وكل عيون الموجودين نسوان وبنات وصغار وكبار عليهم والله يسترهم من الفوته هاي


هون بتبدا التعليقات ....ييي ليش هيك بدلة العروس مش حلوة وشو هالمكياج اللي حاطتو وشو هالتسريحة طالعة مش حلوة بدون مكياج احلى......


طبعا حتى لو كان كل شي مقبول لازم هاي التعليقات لزوم العرس


بدخلو العريس والعروس على اللوج بعد انتهاء الزفة وبرقصو مع بعض وكمان هون بنسمع التعليقات


العريس زي اللطخ بعرفش يرقص ومش ملحلح والعروسة اذا رقصت شوي بحكو عنها ما بتعرف ترقص


واذا رقصت كتير بتخلصش بحكوا عنها مبسوطة وما صدقت وهي تتجوز


وبعدها كل وحده بتشوف صاحبتها او قريبتها او جارتها وبتحكيلها وجهة نظرها يعني بالعامية بفتحو دواوين وبنسوا العرس


وفجأه بتلاقيهم هديو مرة وحده لما يسمعوا انو اجا وقت تقطيع الجاتوه ما مصدقين مهو نصهم جاي عشان الجاتوه


وهاد الوقت بتلاقي الكل سكت وعمالهم باكلو بعدها بتكون رقصة ال slow اللي وقتها بتكون عيون النسوان عشرة على عشرة عشان يشوفوا كل حركة


وبعد رقصة السلو بقومو صاحبات العروس وقرايبها واللي بدو يرقص معها وبكون العريس المسكين كل العيون عليه وهو قاعد بمحلو ومش عارف شو يعمل مع حالو


وبتيجي بعدها فترة تلبيس الدهب....عند النسوان هاي اهم شي بدهم يشوفوا شو جايب العريس للعروس دهب وبستاهل ولا لا وكلهم بنصتوا عشان يشوفوا مزبوط والله يستر العريس ويكون بعرف يفتح الاساور ويكون بعرف يلبس الحلق والعقد


وبتصير العروس تتباها باللي لابستو وبطلعو يسلمو عليها ويفقدو عن قريب وبيجو اهلها ينقطوها واكيد تتصور معهم


والعريس المسكين بستنا باللحظة يدخلوا صحابو وقرايبوا واول ما يدخلوا يتنفس الصعداء وبفرش ريشو وبنبسط


وكل ما بشوف العدد اكبر بنبسط اكتر


وبيجوا هالاصحاب والاحباب والقرايب عشان ينقطو العريس ويعملو حفلة مع بعض وبتكون العروس نازلة تسلم وتضحك مع هادي وهديك


بخلص العرس بخير وسلامه وبطلعو العرسان ولسا التسوان ما روحت بستنوا بالعشا


وطبعا العريس المسكين لازم يعمل غدا تاني يوم بكفيش اللي دفعو


واكيد ما بننسى الملبس علوز التحلاية صباحية العرس والله يجيرنا من كلام النسوان


والله يجعلوا الف الف مبروك